ခင်ဗျားနားလည်အောင် ကျနော်ဘယ်လိုပြောရမလဲ
ကျနော်နားလည်အောင်လည်း ခင်ဗျားရအောင်ရှင်းပါ
ခင်ဗျားနဲ့ကျနော် ဘာသာစကားမတူတဲ့အခါ
ခင်ဗျားရင်ဘတ်ကို ကျနော့်ကိုငှားပြီး
ကျနော့်ရဲ့ဖိနပ်ကို ခင်ဗျားစီးကြည့်ပါ
ရေတဝက်လျော့နေတာပဲဖြစ်ဖြစ်
ရေတဝက်ပြည့်နေတာပဲဖြစ်ဖြစ်
ရေရှိနေတာကိုတော့
ခင်ဗျားရောကျနော်ရော သေချာတယ်
ခင်ဗျားမှာ လွတ်လပ်ခွင့်တွေရှိသလို
ကျနော့်မှာ ရွေးချယ်မှုတွေရှိတယ်
ခင်ဗျားနည်း၊ခင်ဗျားဟန်နဲ့ ခင်ဗျားဘယ်လိုလျှောက်လျှောက်
ခင်ဗျားလျှောက်တဲ့လမ်းဟာ ခင်ဗျားကိုယ်တိုင်ဖြစ်တယ်
ကျနော်လည်း ထိုနည်းလည်းကောင်း ကျနော့်အခင်းအကျင်းနဲ့ ကျနော်
ကျနော်ဟာ ကျနော်ကိုယ်တိုင်ဖြစ်တယ်
ခင်ဗျားသည် ခင်ဗျားဖြစ်၍ ကျနော်သည် ကျနော်ဖြစ်သည်မှာ
ခင်ဗျားလည်းသိ၍ ကျနော်လည်းသိသည်
ထိုကြောင့် ထူးထူးထွေထွေ ဘာကိုမှပြောစရာမရှိပါ
ကိုယ့်ခရီးကိုယ်နှင်ကြရင်း
ကျနော်တို့ မိုင်တိုင်တွေ စိုက်ခဲ့ကြတာပေါ့။ ။
No comments:
Post a Comment